ROXAS CITY – Nagpaathag ang pamunuan sang Roxas City Police Station natuhoy sa ila pagdumili sa mga himata sang preso nga nakahunong sa ila jail facility nga makabisita.
Suno kay Police Captain Rene Hare, temporaryo lamang ang ila nga pagpauntat sa pagbaton sang bisita sang ila Persons Deprive of Liberty (PDL’s).
Ginpahayag sini nga nagsugod ang ini nga pagsulundan sadtong Pebrero 5, 2020 kag ini ang ipatuman sa sulod sang isa ka bulan.
Suno kay Hare nga ini ang kasunod sang ila pagkakompiskar sang kontrabando sa sulod sang jail facility sang ila ang nagpatigayon sang Oplan-Galugad.
Suno diri nga ila nakuha ang pila ka mga drug paraphernalia sa sulod sang jail facility kalakip sang aluminum foil.
Bangud diri, temporaryo nga indi mabisitahan ang mga PDL’s bilang kabahin sang ila nga penalidad.
Mangin ang glass window nga mahimo malantawan sang mga inmates ang gintabunan man sang trapal.
Mahimo lamang makapadulong sa Roxas City PNP ang pamilya sang mga PDL’s agud magdul-ong sang pagkaon apang indi nila ini pwede makita.
Kumbinsido naman ang pamunuan sang Roxas City PNP nga mismo ang pamilya man sang mga PDL’s ang nagapalusot sang kontrabando sa amo nga pasilidad.
Mahibaluan nga isa ka Filipino-Arabian nga preso ang nagtuyo nga magpanginmatay sa sulod sang presuhan apang natigayon nga masalbar kag yara na karon sa hilway nga kahimtangan.
Ini bangud nakabatyag ini sang depresyon bangud sa tuman nga kahidlaw sa iya nga asawa.
