Nagpanawagan ang Roxas City Component Police Station sa publiko nga direkta nga mag-report sa kapulisan sa baylo nga i-post sa social media ang ano man nga insidente.
Ini kasunod sang post sang isa ka netizen nga gintuyo ini nga kawatan samtang nagalakat sa Capiz Bridge sa syudad sang Roxas kahapon sang aga.
Sa interview sang Bombo Radyo kay Police Lieutenant Colonel Ricardo Jumuad Jr., Hepe sang Roxas City Component Police Station, iya ginpahayag nga wala sang blotter report nga nabaton ang talatapan nahanungod sa nagalapta nga post sa social media.
Suno kay Jumuad, mas maayo gid kuntani nga una nga tikang nga himuon sang mga pumuluyo amo ang pagpadulong sa police station agud makaresponde gilayon ang kapulisan.
Dugang pa sang natungdan, sa pagkamatuod may yara sang mga pulis nga naka-deploy malapit sa area.
