ROXAS CITY – Nakafull alert status ang Roxas City Philippine National Police (PNP) kadungan sang selebrasyon sang pista minatay ukon Undas 2020 sa siyudad sang Roxas.
Sa interview sang Bombo Radyo kay Police Lt. Colonel Ricardo Jomuad Jr., hepe sang Roxas City Police Station iya ginpahayag nga nagpatigayun na sila sang inspeksyon natuhoy sa deployment sang mga pulis sa tagsa ka mga patyo.
Ini bangud humalin sa Oktubre 29 tubtob Nobyembre 4 pagasiraduhan na ang tanan nga mga patyo sa pungsod agud malikawan ang pagdagsa sang mga tawo sa adlaw sang tigkalalag.
Suno kay Jomuad, magluwas sa mga pulis, may yara mam sang mga force multipliers nga nakaduty agud magbulig sa pagpasigurado sang malinong kag matawhay mga tigkalalag 2020.
Ginpahayag pa sini nga dapat sundon ang tanan nga mga nagakaigo nga mga minimum health protocols kapareho sang pagsuksok sang facemask, faceshield kag pag-obserbar sang social distancing sa tion nga pahanugotan na nga magkadto sa tagsa ka mga patyo.
