ROXAS CITY – Nagpabalhag sa Roxas City Police Station ang staff sang isa ka kalan-an matapos nga ginaalegar may isa ka wala matumod nga persona nga nagpakilala nga si Vice Mayor Erwin Sicad sa diin ginpangayuan sang load kag nag-order pa sang pagkaon sa ila sa Barangay Baybay, Roxas City.
Suno kay Peejay Bechayda nga nagtawag sa ila ang wala matumod nga persona kag nagpakilala nga vice mayor sang siyudad kun sa diin ginpangayuan sila sang load nga P7,000n kag gilayon man nila ini ginpa-loadan.
Magluwas diri, nagtuyo pa nga mag-order sang pagkaon ang amo nga suspek nga nagabalor sang P16,200.
Apang, diri na sila nagduda kun sa diin ulihi na natukiban nga indi si Vice Mayor Sicad ang nagtawag sa ila sa baylo modus ini sang wala matumod nga suspek.
Bangud diri, ginpakamaayo na lamang sang nasambit nga staff nga iparekord sa pulisya ang insidente.
Nagapadayon naman ang imbestigasyon sang mga otoridad agud matumod ang amo nga suspek.
