ROXAS CITY – Padayon ang pagpatigayon sang maid-id nga imbestigasyon sang Roxas City PNP, angut sa pagpangluthang-patay sa isa ka 40-anyos nga lalaki sa Calipayan St. Punta Tabuc, Roxas City takna 11:50 sang tinalikdan nga gab-i.
Sa interview sang Bombo Radyo kay PLT. Col. Francisco Paguia Hepe sang Roxas City PNP, ginpahayag sini wala sila naga-untat sa pag-imbestiga ilabi na sa karun nga may yara na sila sang ginasundan kag ginalantaw nga anggulo sa pagpatay kay Jeff Ardeña isa ka repairman kag residente sang Barangay Cagay sining syudad apang temporaryo nga nagapuyo sa Bayot Drive, Barangay IX.
Suno kay Paguia, isa sa mabakod nga anggulo nga ila ginalantaw sa pagpatay sa biktima amu ang may kaangtanan sa iligal nga droga.
Mahibaluan nga yara sa ila watchlist si Ardeña kag anay man nga nagsungka sa ila sadtong 2016 kag natigayon nga madakpan may kaangtanan sa iligal nga droga sadtong 2018.
Pahayag sang hepe nga posible indi lamang duha ka persona ang yara sa likod sang nasambit nga insidente bangud magluwas sa duha ka mga persona nga nagasunod sa suspek ginapahayag sang mga nakakita nga may yara pa sang nagabantay malapit sa ginluntaran sang insidente.
Matandaan nga ginpadangat pa si Ardeña sa ospital apang gindeklarar ini nga dead on arrival sang doctor.
Sa karun, ginatutukan pa sang mga kapulisan ang kuha sang Closed-circuit Television (CCTV) sa lugar agud makakuha sang dugang nga impormasyon kag matumod ang mga suspetsado.
