Magasugod na sa pagdeploy ang katapo sang Roxas City PNP sa tanan nga pribado kag publiko nga sementeryo sa bug-os nga syudad sa Oktubre 30 sini nga tuig para sa pista minatay.
Ini ang ginkumpirmar ni PLt.Col. Aron Palomo, Hepe sang Roxas Component City Police Station sang ma-interview sang Bombo Radyo.
Suno diri, magapahamtang sila sang police assistance desk sa kada sementeryo agud mag-asister sa mga pumuluyo nga magabisita sa ila mga nagtaliwan nga himata.
Magadugay ang ila deployment tubtob Nobyembre 3, depende sa kadamuon sang nagapadulong nga tawo.
Dugang pa ni Hepe nga mangin kaupod nila diri ang katapo sang CDRRMO, BFP kag mga Barangay tanod nga magabulig bantay sa pag-obserbar sang minimum health protocols.
Ginsiling sini nga nangin matawhay ang nakaligad nga pista minatay bangud sa restriksyon tuga sang Covid-19, gani ginapangamuyo man niya nga wala sang may mangin problema kag mangin matawhay man subong nga tuig.
Samtang suno kay Palomo, padayon man ang ila deployment sa mga malls kag terminals ilabi na nga madamo ang nagapauli subong diri sa probinsya gikan sa iban nga lugar.
Pangabay sini sa mga pumuluyo sa palaabuton nga Undas nga likawan magdala sa sementeryo sang makahulubog nga ilimnon, iligal nga kagamitan kasubong sang patalom kag armas-luthang, dapat lisensyado ang driver, kag isiguro ang seguridad sang panimalay antes maglakat.
