ROXAS CITY-Padayon ang imbestigasyon sang mga kapulisan sa siyudad sang Roxas sa konektado nga mga indibidwal sang tatlo ka mga drug suspects nga nadakpan sa ginkasa nga drug buybust operation sa Barangay Poblacion Norte, Ivisan, Capiz.
Sa interview sang Bombo Radyo kay Police Master Sergeant Ramil Arcangeles, tagpamaba sang Roxas City Police Station ginpahayag sini nga dako ang mabulig sang cellphone nga narekober sa mga suspek agud matumod ang iban pa nga mga indibidwal kalakip na ang mga parokyano nga may yara sang koneksyon sa mag-asawa nga Jean Francis kag Jun-Jun Lima subongman si German Bolarde.
Suno kay Arcangeles nga madamo sang mga parokyano nga nagbakal sa mga suspek indi lamang sa siyudad mangin sa kaiping nga mga kabanwahanan.
Samtang, padayon naman nga ginausisa sang mga otoridad kun sa diin nagakuha sang suplay sang iligal nga droga ang tatlo ka mga persona.
Nagapati naman si Arcangeles nga indi ini naghalin sa probinsiya bangud wala man diri sang laboratory sa iligal nga droga.
Matandaan nga kapin sa 1.6M nga balor sang shabu ang narekober sang mga kapulisan sa mga suspek.
