Ginkilala bilang Top Operating Unit kag Best Performing Police Station ang Roxas City Police Station bangud sa mataas nga rating nga nakuha sa administrative kag operational accomplishments sa bulan sang Setyembre 2026.
Sa interview sang Bombo Radyo kay Police Lieutenant Colonel Rogelio L. Tomagtang Jr., Chief of Police sang Roxas City Police Station, iya ginpahayag nga resulta ini sang padayon nga dedikasyon kag pagbinuligay sang mga personnel sa paghatag sang epektibo nga serbisyo kag pagpanalipod sa komunidad.
Suno kay Tomagtang, isa sa mga rason sang ila pagkilala amo ang mga operational accomplishments sang estasyon, lakip na ang pag-deploy sang mga katapo sang kapulisan agud matapna ang posible krimen kag mapabakod ang seguridad sa syudad.
Dugang pa sang natungdan, nagapabilin ang Roxas City Police Station sa pagpatuman sang ila mga katungdanan kag mga programa agud mapabilin ang kalinong kag kahilwayan sang mga pumuluyo.
