ROXAS CITY – Ginpasalig sang hepe sang Roxas City Police Station nga pagatutukan ang imbestigasyon angut sa nagpakilala nga isa ka politiko nga nagpangayo sang load kag nag-order sang milk tea sa syudad sang Roxas.
Sa interview sang Bombo Radyo Roxas kay Police Lieutenant Colonel Ricardo Jomuad Jr., ginapahayag nga may isa ka persona ang nagpanawag sa isa ka empleyado sang milk tea stand nga nahamtang sa Roxas Avenue kag nagpakilala nga si Vice Mayor Erwin Sicad kun sa diin nag-order sang 40 ka bilog nga milk tea.
Suno kay Jomuad nga magluwas sini, nagsugo pa ang nagpakilala nga politiko nga pa-loadan ini sa pinakamalapit nga 24/7 convenience store nga nahamtang naman sa Fuentes Drive rason nga gintuman man ini sang empleyado kun sa diin nagdangat sa kapin P116,000 nga balor.
Suno kay Jomuad nga wala na natalupangdan sang empleyado ang gin-ubra sini kag ulihi na natukiban nga nabiktima ini sang budol-budol.
Ginklaro man sini nga wala nakuha ang mga milk tea apang madinalag-on nga nabaton sang nagpakilala nga Sicad ang load.
Dugang pa ni Jomuad nga makaduha ukon makatatlo na ka beses nga nadalahig kag gingamit ang pangalan ni Sicad sa kapareho nga insidente.
Nagpahanumdom man ini sang paghalong sa publiko agud malikawan ang kaangay nga insidente ilabi na gid kag nagahilapit ang adlaw sang paskwa.
Suno diri nga indi gilayon magsalig sa tion nga may nagatawag kag nagapakilala nga kilala nga mga politiko rason nga tsekyaron ini sang maayo.
Samtang, nagapadayon sa karon ang imbestigasyon sang mga kapulisan angut sa nasambit nga hitabo.
