ROXAS CITY, CAPIZ- Nagapaalinton ang Roxas City Police Station sa publiko, ilabi na sa mga negosyante natuhoy sa ‘fake money scams’ nga sa gihapon nagakatabo sa syudad sang Roxas kag sa iban pa nga mga kabanwahanan sa probinsya sang Capiz.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas City Police Station, iya ginpahayag nga wala sa gihapon mauntat ang pagpangbiktima sang mga manugtunto.
Suno kay Arcangeles, may posibilidad nga mas magdamo ang kaso sang ‘fake money scams’ sa subong nga tion nga nagahilapit ang holiday season.
Pahayag nya, maayo kuntani nga ang tagsa ka mga negosyante ukon mga manugbaligya, makaangkon sang money detector, agud nga malikawan nga mangin biktima sang amo nga modus sang mga wala huya nga manug-tunto.
Nahibaluan nga sang tinalikdan nga mga inadlaw, isa ka manugbaligya sang kape sa Teodoro Arcenas Trade Center ang nabiktima sang peke nga P1,000 bill.
Nagapanawagan ang natungdan nga kuntani mahatagan sang mga money detector per section sa mga balaligyaan kag usisaon nga maayo ang nagakabaton nga kwarta halin sa mga nagabakal agud nga malikawan nga mabiktima sang amo nga modus.
Interviewed by Bombo Sunnie Mae Constantino Batencila
