Ginkilala ang Roxas City Police Station bilang Best Operating Police Station para sa bulan sang Hulyo 2026, bilang pagkilala sa ila maayo nga performance sa operasyon kag pagserbisyo sa komunidad.
Sa interview sang Bombo Radyo kay PLTCOL Rogelio L. Tomagtang Jr., hepe sang Roxas City Police Station, iya ginpahayag nga personal niya nga ginbaton ang nasambit nga pagkilala.
Suno sa iya, ang pagkilala nagapakita sang resulta sang padayon nga pagpaninguha sang mga personnel sa pagpatuman sang nagkalain-lain nga operasyon kag mga inisyatibo para sa seguridad sang mga pumuluyo.
Pahayag pa ni Tomagtang, nagaserbe ini nga dugang nga motibasyon sa mga kapulisan nga padayon nga mapauswag ang ila performance kag pagserbisyo sa komunidad.
Dugang pa sang natungdan, ginahatagan man nila sang importansya ang pagmintinar sang kalinong kag katawhay sa Roxas City, lakip na ang madasig kag husto nga pagresponde sa mga concerns kag insidente nga ginapaatubang sa estasyon.
