Ginpasiguro sang Roxas Component City Police Station nga padayon ang pagmintinar sang kalinong kag seguridad sa Roxas City.
Sa interview sang Bombo Radyo kay Police Lieutenant Colonel Rogelio Tomagtang Jr., Officer-in-Charge sang Roxas Component City Police Station, iya ginpahayag nga padayon ang police visibility kag pagpatrolya sa nagkalain-lain nga bahin sang syudad, ilabi na sa kagab-ihon, agud malikawan ang kriminalidad.
Suno kay Tomagtang, kabahin man sang ila inisyatibo ang duha ka semana nga information dissemination seminar para sa mga managers kag security guards sang nagkalain-lain nga financial institutions para kahandaan sa ano man nga sahi krimen sa mga propedad.
Dugang pa sini, padayon man ang kampanya sang kapulisan batok sa iligal nga droga, iligal nga sugal, mga wanted persons kag iban pa nga iligal nga aktibidad, suno sa direktiba ni Police Colonel David L. Cachumbo Jr., Provincial Director sang Capiz Police Provincial Office, bilang kabahin sang pagpasangkad sang seguridad sa syudad.
