Hugot nga ipatuman sang Roxas Component City Police Station ang temporaryo nga suspension sang Permits to Carry Firearms Outside of Residence (PTCFOR) para sa Capiztahan 2026.
Ini nga memorandum ang ginpirmahan ni Police General Jose Melencio Nartatez, Jr., nga ipatuman humalin 12:01 AM sang Abril 13 tubtub 11:59 PM sa April 19, 2026 kun sa diin ginadumilian ang pagdala sang armas luthang sa guwa sang mga puluy-an, magluwas lang sa mga katapo sang PNP, Armed Forces of the Philippines (AFP), kag iban pa nga law enforcement agencies kag uniformed personnel.
Sa interview sang Bombo Radyo kay Police Chief Master Sergeant Ramil Arcangeles, spokesperson sang Roxas Component City Police Station, iya ginpahayag nga may deployment plan nga gindihon ang ila nga talatapan para sa nasambit nga kahiwatan.
Suno kay Arcangeles, may yara man sang mga igapahamtang nga mga personnel sa mga venue sang Capiztahan sa bulig sang mga force multiplier nga magabulig sa peace and order sang palibot.
Pahayag pa niya, may mga checkpoint man sa pila ka mga entrance points sang probinsya agud ma tsekyar ang mga nagasulod nga mga indibidwal.
Nagapanawagan man ang natungdan sa publiko sang kooperasyon kag magsunod sa mga pagsulundan agud mapabilin ang kalinong kag katawhay sang palibot.
