Nagpaidalum sa mandatory drug testing ang mga katapo sang Roxas Component City Police Station bilang kabahin sang selebrasyon sang International Day Against Drug Abuse and Illicit Trafficking (IDADAIT).
Sa interview sang Bombo Radyo kay Police Lieutenant Colonel Rogelio Tomagtang Jr., Officer-in-Charge sang Roxas Component City Police Station, iya ginpahayag nga ang amo nga aktibidad kabahin sang padayon nga tikang sang Philippine National Police agud masiguro nga drug-free ang hanay sang kapulisan kag mapabakod ang pagsalig sang publiko sa ila serbisyo.
Suno kay Tomagtang, importante ang mandatory drug testing agud masiguro nga ang mga kapulisan mismo nagasunod sa layi kag nagaserbe nga maayo nga ehemplo sa komunidad sa kampanya batok sa iligal nga droga.
Pahayag pa niya, ang inisyatibo nagapakita sang pagpasalig sang Roxas City PNP sa pagpatuman sang disiplina, integridad, kag hugot nga kampanya kontra sa iligal nga droga.
Nahibaluan nga may kabug-usan nga 192 ka personnel ang Roxas Component City Police Station, lakip na ang 8 ka non-police personnel, kag 123 ang nagpaidalum sa drug testing.
Base sa resulta sang ginpatigayon nga eksaminasyon, nagnegatibo sa paggamit sang iligal nga droga ang halos tanan nga mga personnel, bagay nga ginpasalamatan sang natungdan, bangud nagapakita ini sang dedikasyon sang ila mga katapo sa matinlo kag responsable nga pagserbisyo sa pumuluyo.
