Pasangkaron sang Roxas Component City Police Station ang police visibility sa syudad agud matapna ang nagkalain-lain nga krimen.
Sa interview sang Bombo Radyo kay Police Lieutenant Colonel Donnel Regis, hepe sang amo nga talatapan, iya ginpahayag nga pagatutukan nila ang mga kaso sang pagpangawat, iligal nga droga, illegal gambling, robbery kag iban pa nga klase sang krimen.
Suno kay Regis, naka-coordinate na sila sa mga punong barangay kag nagahimo sang nagkalain-lain nga tikang upod ang iban pa nga ahensya sang gobyerno agud mas mapabaskog ang kampanya kontra krimen.
Dugang pa Regis, nga mas pasangkaron pa ang koordinasyon sa tunga sang City Government kag Roxas Component City Police Station agud masiguro ang seguridad sang mga pumuluyo sang cuidad.
Nahibaluan nga si Regis ang nagtal-os sa nabakante nga posisyon ni Police Lieutenant Colonel Ricardo Jomuad Jr., nga lakip sa pila ka mga hepe sa Capiz nga gin-relieve sa pwesto kag gin-reassign sandig sa mando sang Police Regional Office 6.
