ROXAS CITY – Pormal na nga ginlunsyar sang gobyerno probinsyal ang Roxas Memorial Provincial Hospital Out-Patient Department Molecular Laboratory subong nga adlaw Disyembre 15, 2020.
Ini ang ginpangunahan ni Capiz Governor Esteban Evan Nonoy Contreras kaupod ang DOH Regional Director Dr. Marlyn Convocar.
Makita man ang presensya sang pila ka mga anay gobernador nga sanday former Governor’s Gov. Victor Tanco Sr., Gov. Ting Borda, Gov. Ting Borda kag Gov. Vic Bermejo.
Subongman ang Provincial DOH Dr. Joy Castroverde, Provincial Health Officer Dr. Sam Delfin, RMPH OIC Dr. Edmarie Tormon, mga hospital heads, pila ka department heads, Rural Health Officers, Uniformed Personnels, City Officials, Mayors and Vice Mayors of different LGU’s kag Media.
Ginpangunahan ni Rev. Fr. Romel Darundon ang pagbendisyon sa amo nga laboratoryo kun sa diin ginsundan ini gilayon sang ribbon cutting ni Dr. Convocar.
Nagpasalig naman ang DOH-6 nga magahatag sila sang 1.5 million pesos nga budget para sa dugang pa nga mga kinahanglanon nga kagamitan kasubong nalang sang PPE’s kag iban sang mga maga duty nga Medical Technologist kag Pathologist.
Ang nasambit nga laboratoryo ang makabulig sa mga pumuluyo sang 16 ka mga kabanwahanan sa probinsya sang Capiz kag siyudad agud nga mangin mahapos kag madasig na ang paguwa sang resulta sang Swab Test ukon RT-PCR Test.
Suno kay Contreras bukas ini sa tanan nga nagakinahanglan sang serbisyo, private hospitals kag mangin sa mga taga-Northern Iloilo.
Nahibaluan nga ika-12 na ini nga molecular laboratory nga gintukod sa bilog nga Western Visayas.
