PILAR, CAPIZ — Ginatutukan sang Provincial Government of Capiz ang nagapadayon nga problema sang Red-Striped Soft Scale Insect ukon RSSI sa mga umahan sang tubo, samtang ginpatuman ang drone-assisted biological control spraying sa masobra 90 ka ektarya nga katubuhan sa Pilar.
Ginpahigayon ang spraying demonstration subong nga Setyembre 3 sa mga barangay sang Sta. Fe, San Nicolas kag Balogo, bilang bahin sang mga tikang sang probinsyal nga gobyerno sa pagpugong sa paglapta sang pest infestation nga nagahatag sang kabudlayan sa mga mangunguma kag nagapeligro sa industriya sang tubo sa Capiz.
Paagi sa drone technology, gin-aplikar sa mga apektado nga umahan ang nagkalain-lain nga biological kag crop protection agents, lakip na ang Thiamethoxam kag Chlorantraniliprole, Neem Oil nga may Azadirachtin, kag Metarhizium anisopliae, isa ka klase sang entomopathogenic fungi nga ginagamit sa pagkontrol sang mga peste.
Indi lamang pag-spray ang sentro sang intervention. Gin-updan ini sang mga agricultural experts kag technical personnel halin sa Agricom Visayas Inc., Regional Crop Protection Center, Regional Agricultural Engineering Division, Office of the Provincial Agriculture kag Municipal Agriculture Office sang Pilar, kaupod ang mga lokal nga mangunguma.
Ini nga mga tikang nagasunod sa deklarasyon sang State of Calamity sa bilog nga probinsya sang Capiz sang Agosto 10 bangud sa epekto sang RSSI infestation sa sugarcane industry.
Bangud sini, indi lamang mga planter kag landowner ang apektado, kundi pati ang mga trabahador nga nagasalig sa umahan sang tubo para sa ila pangabuhian. Gani, ginapakita sang provincial government nga ang pag-atubang sa infestation nagakinahanglan sang mas koordinado kag padayon nga intervention, imbes nga isa lamang ka beses nga operasyon.
Samtang ginatesting kag ginapatuman ang nagkalain-lain nga pamaagi sa pagkontrol sang RSSI, nagapabilin nga daku nga hagad sa mga otoridad ang pagprotektar sa mga umahan kag paglikaw sa mas daku pa nga epekto sini sa produksyon sang tubo.
Sa tunga sang sini nga krisis, ang mensahe sang mga tikang nga ginpatuman sa Pilar klaro: ang pagluwas sa sugarcane industry amo man ang pagprotektar sa pangabuhian sang mga pamilyang nagasalig diri. Kag bangud nga yara pa sa proseso ang pag-atubang sa RSSI infestation, ginapaabot nga magapadayon ang monitoring kag intervention sa mga apektado nga katubuhan sa probinsya.
