DUMARAO, CAPIZ — Nakaapekto na sa kapin 60.98 ektarya nga tubuhan sa banwa sang Dumarao ang paglapta sang Red Striped Soft-Scale Insect ukon RSSI, suno sa pinakahuli nga progress report record sang Capiz Provincial Agriculturist Office.
Base sa progress report sang Provincial Agriculturist Office, may 123 ka mangunguma sa Dumarao ang naapektuhan sang pest infestation, nga may kabug-usan nga 181.90 ektarya nga area nga gintamnan. Sa sini, 60.98 ektarya ang na-record nga apektado sang RSSI, nga yara sa kategorya nga partially affected.
Ang RSSI isa ka peste nga mahimo makapaluya sa tubo kag makaapekto sa produksyon sang mga mangunguma kon indi ini gilayon matukiban kag makontrol. Ginasakop sang assessment ang pag-monitor kag pag-validate sang mga apektado nga lugar agud mahibaluan ang aktuwal nga lawak sang infestation kag ang epekto sini sa mga sugarcane farmers.
Sa interview sang Bombo Radyo Roxas kay Mayor Atty. Mateo Concepcion Hachuela, ginpakigbahin niya nga madamo gid nga sugarcane farmers sa banwa sang Dumarao, Capiz ang naapektuhan sang Red Striped Soft-Scale Insect. Tungod sina, ginahingagaw man niya nga mahatagan ini sang solusyon kag pagbulong agud nga matapna ang ini nga klase sang halit.
Dugang pa niya, dako gid ang naging apekto kay isa ini sa mga source of living sang mga pumuluyo sang Dumarao, kay sa subong mahal naman ang labor, mahal ang pag-abuno, kag halos tanan mahal na gid. Ginpahanumdom man sang alkalde sa tagsa ka mga pumuluyo ilabid na gid ang mga sugarcane farmers sang Dumarao nga indi madulaan sang pag-asa bangud ang gobyerno padayon nga nagaplano sang masunod nga mga tikang agud matapna ini.
Samtang nagapadayon ang monitoring kag validation sang mga awtoridad, ginatutukan man ang sitwasyon sang mga mangunguma sa Dumarao agud mahibaluan ang kinahanglan nga intervention kag suporta para sa mga apektado sang RSSI.
