Nagpatigayon sang pagsinapol ang Red-striped Soft Scale Insect (RSSI) Task Force sang Agosto 11, 2026, kaupod si Governor Fredenil H. Castro bilang chairman, agud talakayon ang nagapadayon nga epekto sang RSSI infestation sa mga pananom nga tubo sa probinsya sang Capiz.
Sa pagsinapol, ginpangunahan ni Governor Castro ang pagtalakay sa mga nagakaigo nga bulig kag suporta para sa mga sugar planters kag magagmay nga mangunguma nga apektado sang infestation.
Gintutokan man ang pagpangita sang posible nga ayuda nga makabulig sa mga mangunguma sa ila pagkapyerde kag pangabuhian, samtang ginatalakay ang mga pamaagi nga mahimo ipatuman agud mapunggan ukon makontrol ang paglapta sang RSSI.
Kabahin man sa mga ginkasugtan ang pagpakig-angut sa national government kag sa iban pa nga mga ahensya para mapabakod ang koordinasyon kag suporta sa pag-atubang sang problema.
Ginahinalaan man sang task force ang mga ginarekomendar nga kemikal ukon bulong batok sa RSSI, lakip ang ginarekomendar nga gasto sa kada ektarya sang tubo.
Ini agud makaplano kag makapreparar ang probinsya sang nagakaigo nga mga tikang kag intervention sa labing madali nga tion.
Samtang, padayon ang Provincial Government of Capiz sa pagpangita sang iban pa nga posible nga solusyon sa sini nga problema sa agrikultura, ilabi na matapos ideklara ang State of Calamity sang Agosto 10, 2026 bangud sa epekto sang RSSI infestation.
Sa pagpanguna ni Governor Castro, ginapaabot nga mapabakod pa ang koordinasyon sang probinsya, national government kag iban pa nga mga ahensya agud mahatagan sang nagakaigo nga sabat ang epekto sang RSSI sa industriya sang tubo kag sa pangabuhian sang mga mangunguma sa Capiz.
