Wala pa sang reaksyon ang actress nga si Ruffa Gutierrez sa ginpaguwa nga pamatbat nga guilty sa graft case batuk sa nobyo sini nga actor kag anay Quezon City Mayor Herbert Bautista.
Napamatbatan nga guilty sang Sandiganbayan si Bautista kag ang anay city administrator sini nga si Aldrin Cuña bangud sa graft.
Nag-ugat ang kaso sa pagpaguwa ni Bautista sang P32.107 million bilang kabug-usan nga bayad sa isa ka Information Technology firm para sa pagbakal sang mga online occupation permitting and tracking system sadtong 2019.
Ginapahayag nga nagsulod si Bautista sa isa ka kontrata kag gin-aprubahan ang pagpaguwa sang kabug-usan nga bayad apisar wala pa na-deliver ang proyekto kag ang kakulangan sang ordinansa nga gin-aprubahan sang Sangguniang Panglungsod.
Sa ginpaguwa nga 148 ka panid nga desisyon sang Special Seventh Divison, napamatud-an nga guilty beyond reasonable doubt sanday Bautista kag Cuña bangud sa paglapas sa Section 3 sang Anti-Graft and Corrupt Practices Act.
Sadtong Hunyo 2024, gin-ako sang actress nga may relasyon sila sang komedyante kag former politician nga si Herbert Bautista.
Ginpahayag naman sang abogado ni Bautista nga si Atty. Nilo Divina nga ila nga igaapelar ang nasambit nga kaso sa Sandiganbayan.
