Gin-aresto na sang mga otoridad ang Russian American vlogger nga si Vitaly Zdorovetskiy bangud sa ginhimu nga pagpang-bastos sini sa pila ka mga Pinoy sa Bonifacio Global City.
Suno sa Bureau of Immigration (BI) nga ang 33-anyos nga si Zdorovetskiy ang ginakabig sa karon bilang undesirable foreign national.
Ang pag-aresto sa ginreklamo nga foreigner ang natabo matapos ang sunod-sunod nga reklamo sang mga security guards subong man sang mga empleyado sang mga malls sa syudad sang Taguig.
Kaupod sang BI, ang mga tinawo sang Makati City PNP kag Criminal Investigation and Detection Group (CIDG) ang naghimo sang pagpangdakop.
Yara na karon sa kustodiya sang immigration facility sa Camp Bagong Diwa sa Bicutan, Taguig ang foreigner samtang ginahulat ang pagproseso sang iya deportation.
Madumduman sa video sang foreigner nga ginhampangan pa sini ang kalo sang gwardya sang mall kag gintuyo nga agawon ang pusil.
Gintinguhaan pa niya nga kuhaon ang industrial fan sa restawran kag gindala ini sa hotel nga iya ginadayunan.
Isa ka petisyon ang nagsugod man sa paglapta sa Change.Org agud i-ban si Zdorovetsky sa tanan nga social media bangud sa cyberbullying sa Pilipinas.
