Ginpabaskog sang Department of Health ang Safe Motherhood Awareness sa idalom sang National Safe Motherhood Program agud malikawan ang mataas nga kaso sang maternal deaths.
Sa interview sang Bombo Radyo kay Ma. Theresa Asis, Nurse II sang Capiz Provincial Health Office, iya ginpahayag nga dapat nga indi magnubo sa walo ka prenatal care ang ipatigayon sang isa ka gabusong nga babayi agud ma-monitor ang kahimtangan sini kag sang bata.
Paagi sini, maaga nga madiskubre kag mabulong ang posible nga komplikasyon antes pa man maglala.
Suno kay Asis, dapat man nga magpa-check up ang isa ka gabusong sa first trimester, kay ini ang pinakaimportante nga bahin para sa early detection sang high-risk pregnancy.
Ginpaathag man sini ang konsepto sang “Three Delays” nga isa sa mga rason sang maternal deaths: ang delay sa desisyon magpa-bulig, delay sa pag-abot sa health facility, kag delay sa paghatag sang tama nga treatment.
Dugang pa sang natungdan, daku ang papel sang bana, pamilya, kag barangay health workers sa pag-atipan sa babayi nga nagabusong ilabi na ang pagbantay sa regular nga check-up, husto nga nutrisyon, vaccination, kag skilled birth attendance, masiguro ang kaluwasan sang iloy kag sang bata.
