ROXAS CITY, CAPIZ- Ginpakigbahin sang Roxas City Police Station ang Safety Tips may kaangtanan sa paghalong sa tagsa ka mga motorsiklo sang tagsa ka mga nagapanag-iya agud indi ini magkalataban sang mga kawatan.
Sa interview sang Bombo Radyo kay Police Chief Master Sergeant Ramil Arcangeles, tigpamaba sang Roxas City Police Station, ginpahayag nga kasunod sang madamo nga serye sang kinawatay sang motorsiklo sa syudad sang Roxas, nagpahanumdom ang mga kapulisan may kaangtanan sa paghalong sang tagsa ka mga motorsiklo sang tagsa ka mga nagapanag-iya agud nga indi mabiktima sang mga kawatan.
Samtang, yari ang mga kinahanglan nga himuon sang isa ka tag-iya sang motorsiklo agud malikawan nga mabiktima: una, siguraduhon nga naka lock ang mga dapat nga i-lock sa motosiklo antes ini nga bayaan ukon i-parking; ikaduha, indi mag-park sa mga madulon nga lugar ukon sa lugar nga wala sang mga tawo ukon wala sang mga panimalay; ikatlo, indi pagkalipatan nga kwaon ang yabe antes nga bayaan ang motorsiklo ka gang katapusan, siguradohon nga nakumpleto sa pag-lock ang tanan nga mga locking systems sang motorsiklo.
Dugang pa ni Arcangeles, kun sarang manlang nga makapa-install sang alarm system sa motorsiklo, mahimo nga magpatakod agud nga dugang pa nga makahatag sang alarma sa mga tawo nga malapit sa motorsiklo kun ini ang ginaplanuhan na nga guyudon agud nga gilayon man nga matapna ang mga makawat.
Nagapanawagan si Arcangeles, nga sundon ang mga safety tips nga ginpakigbahin sang mga kapulisan agud nga malikawan nga mabiktima sang mga kawatan kag sa tion nga mabiktima, gilayon nga magpadulong sa ila nga talatapan agud nga mahatagan sang nagakaigo nga aksyon.
With a report from Bombo Francis Biñas
