ROXAS CITY – Magaabot sa Metropolitan Cathedral and Archdiocesan Shrine of the Immaculate Conception ang Madre Peregrina de Mexico humalin Agosto 27 tubtob Agosto 30, 2026, bilang kabahin sang pagpreparar sa ika-500 nga anibersaryo sang mga pagpakita sang Birhen Maria kay San Juan Diego.
Sa interview sang Bombo Radyo kay Fr. Josel Beltran, Vicar Forane of the Vicariate of the Immaculate Conception, ginpaathag niya ang importansya sang pag-abot sang Madre Peregrina de Mexico sa Capiz kag ang kahulugan sini para sa mga Katoliko nga deboto sang Birhen Maria.
Suno kay Beltran, ang pagbisita sang Madre Peregrina de Mexico ginakabig nga isa ka makasaysayan nga okasyon nga nagapalig-on sang pagtuo, paghigugma kag paghiliusa sang mga Katoliko sa Capiz.
Ginaagda man sini ang mga tumuluo kag mga deboto nga mag-upod sa mga aktibidad, magpangamuyo kag magpakita sang debosyon sa pag-abot sang Sagrado nga imahe sang Our Lady of Guadalupe.
Magaabot ang sagrado nga imahe sa Cathedral sa alas-3 sang hapon sa Agosto 27, Huwebes, kag sundan ini sang regular nga misa alas-5:30 sang hapon.
Sa Agosto 28, Biyernes, maga-organisar sang Welcome Mass alas-3 sang hapon nga pangunahan ni Most Rev. Victor B. Bendico, D.D., Archbishop of Capiz.
May yara man sang regular Mass, healing session kag prayer vigil sa amo man nga adlaw.
Samtang sa Agosto 29, Sabado, yara sa schedule ang prayer vigil kag healing, caravan pakadto sa Dao, misa sa St. Thomas de Villanova Parish sa Dao, kag caravan pabalik sa Cathedral.
May yara man sang anticipated Masses kag dugang nga prayer vigil kag healing session.
Sa Agosto 30, Domingo, pagapangunahan naman sang Arsobispo sang Capiz ang Farewell Mass antes nga magbiyahe ang sagrado nga imahe pakadto sa Kalibo alas-12:30 sang udto.
