Naubon ang isa ka sakayan pandagat nga may karga nga 103 tanan ka mga baboy sa kalalawran nga sakop sang Barangay Punta Cogon, syudad sang Roxas.
Sa interview sang Bombo Radyo kay kagawad Yolando Besa, ginpahayag nga takna alas 11 kagab-e, nagpangayo sang bulig ang 5 ka mga tripulante nga sakay sang naubon nga sakayan nga may karga nga 103 tanan ka mga baboy nga igadeliver kun tani sa pantalan sang Barangay Banica.
Gilayon man nila ini nga ginrespondehan kag ginbuligan ang nasambit nga mga tripulante kag ginpakaon bangud maluya na ini kag ginatugnawan.
Nautod ang tarik bangud sa mabaskog nga balod rason nga nagtakilid ini kag naubon sa tunga sang lawod.
Ginbululigan, sang mga residente sang nasambit nga barangay kalakip na ang mga Barangay officials nga mapatakas ang yara sa 103 tanan ka mga baboy kag gindul-ong sa Banica.
Pahayag pa ni Besa nga yara sa 6 ka mga baboy ang ginpatay nalang sang amo nga mga tripulante bangud maluya na ini agud mapuslan pa ang karne sini.
Samtang, mahibaluan nga yara sa impluwensya sang makahulubog nga ilimnon ang nasambit nga mga tripulante kalakip na ang kapitan sang amo nga sakayan.
Sa karon, ginatinguhaan na nga makaayo ang amo nga sakayan.
