ROXAS CITY – Matapos ang masobra 24-oras nga wala makapauli ang 20-anyos nga sakristan sa ila balay, ginpakamaayo sang Iloy sini nga ipabalhag sa mga katapo sang kapulisan kag ginsuguran ang pagpangita sa ‘missing’ nga anak.
Apang, matapos ang masobra 1 ka adlaw nga pagpangita sa amu nga bata, nasapwan nalang ini nga bangkay sa isa ka suba, sa ila man barangay.
Matandaan nga ginkilala ang biktima kay Joey Dumangon, hinipo nga lalaki sa pito nga mag-ulutod, residente Barangay Anhawon, Panay, Capiz.
Nagpadulong ang biktima kaupod ang iya abyan nga lalaki sa balay sang iya gin-maninoyan mga takna alas-3:00 sa hapon, sang Sabado, Enero 22.
Tubtob nga mga alas-11:00 sang gab-i, sang ginpahayag sang abyan sang biktima nga may natabo nga rambol sa tunga sang mga naga-inom-inom sa amu man nga balay kag ginaalegar nga si Joey ang na-tripingan sang kastigo.
Bangud sa indi na mapunggan ang mga lunsay hubog na nga mga kalalakinhan, ginpahayag nga separado nga nagdalagan ang biktima kag ang iya abyan, kag sa kanipaan nakapadulong ang biktima.
Aga sang Domingo, Enero 23, sang nagakabalaka ang Iloy ni Joey nga wala makapauli ang iya bata.
Sa interview sang Bombo Radyo kay Josephine Dumangon, iloy sang biktima, nga kampante man ini sa mga persona nga upod sang iya bata bangud naglaong man ang amu nga soltero nga magapadulong ini sa balay ni Haide Azares, nga kilala man sini sa ila man barangay.
Apang, ginkakulba na sang iloy, sang abyan na ni Joey ang nakasabat sang iya tawag sa cellphone sang biktima, kag ginpahibalo nga may nagluntad nga rambol sang gab-i palang sang Sabado.
Bangud diri, ginpangita nila ang biktima kag nagpahibalo sa kapulisan.
