ROXAS CITY – Pilas ang naangkon sang isa ka lalaki matapos aksidente nga bumunggo ang iya ginameho nga salakayan sa isa ka balay sa national highway sang Barangay Cogon, Panit-an, Capiz, alas 9:00 nga aga sang Martes.
Ginkilala ang Driver sang salakyan kay Willy Jalbuna Ticar Jr., 31- anyos kag residente sang Brgy. Daga Panay, Capiz, samtang ang tag-iya sang balay ang ginkilala kay Josefa Dumanil Hinco 68- anyos, kag residente sang nasambit nga barangay.
Sandig sa imbestigasyon ni PCpl. Carl Bryan A. Albisor, samtang ginasubay sang suspek ang dalanon nagikan sa Brgy. Daga, banwa sang Panay padulong kuntani sa banwa sang Pilar sakay sa iya nga salakyan nga Toyota Innova, pag-abot sa lugar sang ginluntaran sang insidente, ginpahayag nga ginlikawan niya ang nagatabok nga persona sa karsada apang wala sini nakontrol ang manubela kag dumiretso sa balay sang biktima kun sa diin ginkasamad sang balkon sang balay sini.
Magahatag naman sang bayad ang driver para sa naguba nga bahin sang balay sang biktima kag nagkasugot nga indi na magpasaka sang panumbungon.
