ROXAS CITY – Hilway sa katalagman ang mga sakay sang Nissan Sentra nga salakyan matapos nga bumunggo ini sa naka-park nga trak sa Atila Balgos Avenue, Brgy. Banica, sini nga syudad, pasado alas-3 kaina sang kaaganhon.
Ginkilala ang driver sang Nissan Sentra kay Joemiebel Obordo, 53-anyos, sang Graceville Subd., Brgy. Tiza, sini nga syudad kag ang pasahero sini nga si Joselito Pamatian, 25-anyos nga residente sang Poblacion, Sapian, Capiz.
Sandig sa inisyal nga imbestigasyon ni PCpl. Ben Angelo Celino sang Roxas City PNP, nga nagikan sa banwa sang Sapian ang salakyan apang aksidente nga nakabunggo ini sa ulihi nga bahin sang naka-park nga trak nga may karga nga balas nga ginkilala ang driver kay Russel Bereber, 32-anyos kag ang kaupod sini nga si Jemary Fuentes, 27-anyos nga lunsay mga residente sang Brgy. Cabungahan, banwa sang Maayon.
Masuwerte nga wala sang napilasan sa mga sakay sang nakabunggo nga salakyan apisar nga wasak ang nauna nga parte sang amu nga salakyan.
Ginapahayag nga may ginpahamtang nga early warning device ang naka-park nga trak kag masanag ang lugar.
Nagapadayon ang imbestigasyon sang mga kapulisan angut sa aksidente.
