ROXAS CITY – Wasak ang nauna nga bahin sang Toyota Innova nga salakyan matapos nga bumunggo ini sa poste sang ‘Welcome to Roxas City’ sa boundary sang Brgy. Cudian, Ivisan kag Brgy. Balijuagan, Roxas City.
Sakay sini ang walo tanan ka maghimata, kalakip ang duha ka bata, nga indi na luyag magpahingadlan.
Sandig sa nakuha nga impormasyon sang Bombo Radyo sa BFP-Ivisan nga amu ang nagresponde sa aksidente, nagikan ang maghimata sa isa ka bakasyon sa isla sang Boracay kag pauli na kuntani sa ila puloy-an diri sa syudad kagab-i sang Miyerkules, apang wala matalupangdan sang driver nga malapit na ini sa nasambit nga poste.
Nahibaluan nga ginasubay sang salakyan ang 4th lane sang nasambit nga karsada.
Madasig man nga ginpadangat sa ospital ang mga sakay kalakip ang duha ka mga kabataan, nga yara man sa hilway nga sitwasyon.
