ROXAS CITY -Pilason nga ginpadangat sa isa ka pribado nga ospital ang 20 anyos nga babaye matapos na-aksidente ang ginasakyan nga Mitsubishi Adventure sa Sitio Danao Barangay Agkilo banwa sang Panitan.
Ginkilala ang napilasan kay Arjie Joy Dela Cruz sang banwa sang Pontevedra.
Ba-se sa inisyal nga imbestigasyon ni Police Corporal Mark Rendon, imbestigador sang Panitan Municipal Police Station sakay ang biktima sa salakyan kaupod ang duha ka iban pa nga sanday James Denosta, 30-anyos sang Barangay Cubay, President Roxas kag Jorge Denosta, 20 anyos sang Barangay Hanglid sa amo man nga banwa.
Samtang ginasubay na sang tatlo ang dalan padulong sa Roxas City, nag-overtake ini sa isa ka pick-up apang nadulaan sang kontrol ang driver nga kaupod ni de la Cruz matapos naglupok ang isa ka goma sang salakyan.
Bangud diri nabunggo ang salakyan sa poste sang Capelco kag nagtabog si de la Cruz rason nga gindala ini sa ospital agud madapatan sang pagbulong ang naangkon nga kapilasan sa lawas.
Nahibaluan nga wasak ang unahan nga porsyon sang salakyan bangud sa mabaskog nga impact sang pagbunggo sini sa poste.
