Salakyan, nagbaliskad sa Brgy. Tanque sini nga syudad

ROXAS CITY – Masuwerte nga wala nag-angkon sang seryoso nga kapilasan sa lawas ang driver sang Hyundai nga salakyan may plate number FHH 892 nagaduag silver, matapos nga nagbaliskad ini sa may intersection sang Barangay Tanque kag Arnaldo Blvd., sini nga syudad.

Ang wala na ginhingadlan nga driver ang isa ka babayi kag nagaisahanon sa amu nga salakyan.

Sandig sa nakakita sang aksidente, magapaliko kuntani pa city proper ang salakyan, apang sa baylo nga preno ang pagatapakan, gasolinador ang natapakan sini nga amu ang gintunaan sang insidente.

Bangud sini, nawasak ang bumper kag iban pa nga parte sang salakyan.

Ginpadangat ang driver sa ospital para sa nagakaigo nga pagtatap sang naangkon nga gasgas kag menor nga kapilasan sa lawas.