Mahimo sa gihapon nga maagyan ang San Juanico Bridge sa pihak sang pagpaidalom sini sa karon sa retrofitting. Ini ang gin-kumpirmar ni Secretary Manny Bonoan sang Department of Public Works and Highways (DPWH).
Suno kay Bonoan, base sa ila nga pagpangusisa, nadesisyunan nga pasugtan sa gihapon ang light vehicles nga may bug-at sang hasta lang sa tatlo ka tonelada nga mag-agi sa amu nga tulay.
Dugang pa sini, panahon na agud nga ipakay-o kag mag-angkon sang mayor nga rehabilitasyon ang San Juanico Bridge bangud may 50-anyos na ini nga nagserbe nga tagapang-angot sang mga isla sang Samar kag Leyte.
Ginsiguro sang tiglikom nga dasigon nila ang pagkay-o sa nagakatudtod na nga parte sang tulay agud mahimo na nga taasan sang tubtob sa 10-ka tonelada ang load limit subong nga tuig.
Bangud sang ginpatigayon nga preliminary assessment sang DPWH sa San Juanico Bridge, may nakit-an ini nga mga gabok na sa struktura partikular sa idalum nga bahin sang tulay, rason nga temporaryo ini nga ginsirad-an.
Subong man, ginsiling ni Bonoan, nga sa gihapon nagapabilin nga mabakod ang main structure sang tulay rason nga ginpasugtan nila sa gihapon nga makaagi ang mga light vehicles.
Sa karon, ginapatigayon na ang nagakaigo nga retrofitting sa mga gabok na nga parte sang amu nga tulay. Nagapakig-angut naman ang DPWH sa mga Local Government Units, Philippine National Police (PNP) kag Philippine Ports Authority (PPA) para sa pagkontrol sang trapiko sa nasambit nga lugar.
