Ginbalibaran sang Sandiganbayan ang hingyo ni anay Senador Ramon “Bong” Revilla Jr nga isaylo siya halin sa prisuhan sa Quezon City pakadto sa Philippine National Police (PNP) Custodial Center sa Camp Crame.
Sa desisyon sang Third Division sang anti-graft court, ginbasura man ang motion ni Revilla nga i-quash ang nasambit nga impormasyon kag ginbalik sa Office of the Ombudsman ang kaso para sa liwat nga imbestigasyon.
Bangud sa pagbasura sang iya petisyon, magapabilin nga preso si Revilla sa New Quezon City Jail Male Dormitory, sa diin preso man ang iya mga kaupod nga akusado.
Suno sa korte, napaslawan ang anay senador sa pagpakita sang bastante nga rason agud ma-justify ang iya request nga transfer custody, partikular ang iya mga alegasyon nga yara sa katalagman ang iya kabuhi ukon gina-target siya sa sulod sang prisuhan.
Matandaan nga nag-ugat ang kaso sa reklamo sang ginpahalin nga Public Works engineer nga si Henry Alcantara, nga nag-akusar kay Revilla nga nakabaton sang kickbacks gikan sa P92.8-million nga “ghost” flood control project sa Pandi, Bulacan.
Una na nga napreso si Revilla sang apat ka tuig matapos nga involve ini sa P10-billion nga pork barrel scam, sa diin sang ulihi naabswelto ini.
