Ginbasura sang Third Division sang Sandiganbayan ang graft case batuk kay Department of the Interior and Local Government (DILG) Usec. kag anay Iloilo City Mayor Jed Mabilog bangud sang indi makatarungan nga kalawigon sang proseso sang kaso.
Sa resolusyon nga ginsulat ni Associate Justice Karl Miranda, ginhatag sang anti-graft court ang motion to quash ni Mabilog kag ginmando ang gilayon nga pag-dismiss sang kaso batuk sa iya.
Gin-lift man sang korte ang hold departure order batuk kay Mabilog kag ginmando ang pag-release sang iya bail bond.
Nahibaluan nga gin-akusaran si Mabilog nga naglapas sa Anti-Graft and Corrupt Practices Act matapos nga ginhatag niya ang Memorandum of Agreement (MOA) sa 3L Towering Services para sa towing kag clamping sang mga salakyan nga nag-illegal park, nga ginaalegar wala nag-agi sa competitive bidding.
Sa iya motion nga ginfile sang Oktubre 10, 2024, ginpahayag ni Mabilog nga wala sang nagakaigo nga basehan ang kaso kag nalapas ang iya constitutional right sa speedy disposition of cases.
Bisan pa nga nagdesisyon ang korte nga nagakaigo ang mga alegasyon sa information para mapakita ang mga elemento sang ginakaso nga paglapas, nag-ugyon ini sa argumento ni Mabilog tuhoy sa tuman kalawig nga preliminary investigation.
Ginpunto sang korte nga halos walo ka tuig ang nagligad halin sa pag-file sang original complaint ni Manuel Mejorada sang Abril 23, 2015 tubtob sa pag-file sang information sa korte sang Marso 2, 2023.
“It bears emphasis that the Office of the Ombudsman offered no convincing justification or explanation for its failure to file the subject Information immediately,” nasaad sa resolusyon.
