Ginmando sang Sandiganbayan Sixth Division ang 90-day preventive suspension batuk kay Uswag Ilonggo Party-list Representative James “Jojo” Ang Jr may kaangtanan sa gina-atubang sini nga kaso sang graft sa anti-graft court.
Sa idalum sang mga probisyon sang Section 13 sang Republic Act No. 3019 ukon Anti-Graft and Corrupt Practices Act, mandatory ang pagpamatbat sang suspension sa sin-o man nga public official nga naga-atubang sang pormal kag authorized nga panumbungon sang korapsyon samtang ginahulat pa ang proceedings.
Nag-ugat ang kaso sa 14 counts sang graft nga gin-file sang Office of the Ombudsman matapos nga ginbuyagyag sang imbestigasyon nga may yara ini sang gina-alegar financial interest sa mga kontrata sang Department of Public Works and Highways (DPWH) paagi sa pagka-stockholder kag relasyon sa duha ka mga kumpaniya.
Ang amo nga preventive suspension wala pa ginakabig nga isa ka silot kundi isa lamang ka legal nga tikang agud masiguro nga ang opisyal indi makagamit sang iya posisyon sa pag-impluwensya sa mga testigo kag ebidensya sa tion sang proceedings.
