Nagpatigayon sang ocular inspection ang Sandiganbayan Third Division sa ginapahayag “ghost project” sa Pandi, Bulacan nga involved sa kaso sang malversation batuk kay anay Senador Ramon “Bong” Revilla Jr kag iban pa nga mga akusado.
Ang inspection ang kabahin sang court hearing may kaangtanan sa mga petition for bail nga ginpasaka nanday Revilla kag sang isa ka anay opisyal sang Department of Public Works and Highways (DPWH) Bulacan 1st District Engineering Office nga mga kaupod niya nga mga akusado.
Sa inspeksyon, ginpamangkot sang korte ang tiglawas sang DPWH kon ano ang estado sang proyekto nga makita sa lugar.
Suno sa opisyal, wala sang makita nga istraktura ukon maathag nga pag-uswag sa proyekto base sa ila obserbasyon.
Apang nagpamalibad ang pila ka mga kampo sang mga akusado nga magpasugot nga wala sang proyekto sa lugar. Suno sa ila, mahimo nga may mga bahin sang proyekto kaangay sang sheet piles nga nalubong sa duta rason nga indi ini gilayon makita sa ibabaw.
Sang masunod nga examination, gin-ako sang prosecution nga ang pila ka bahin sang mga sheet piles naobserbahan sa lugar, bisan pa nga ini ginapalibutan sang madamol nga hilamon kag nagakalawang.
Ginpanindugan sang kampo ni Revilla nga wala ini sang kahilabtanan sa nasambit nga proyekto.
Madumduman nga ginfile ang kaso sang Office of the Ombudsman sang Enero 2026.
Sa tion sang arraignment sang Pebrero, nagpamalibad si Revilla nga magsulod sang plea gani ang korte nagsulod sang not guilty plea para sa iya.
Samtang, nagsulod man sa not guilty plea ang iban pa nga mga akusado.
