MANILA, Philippines – Nagmandu ang Sandiganbayan sang 90 ka adlaw nga preventive suspension batok kay Senator Jinggoy Estrada matapos siya mapasakaan sang kaso nga graft kag plunder may kaangtanan sa ginapatihan nga P573 milyon nga kickback halin sa pondo sang flood control projects.
Base sa Republic Act No. 7080 ukon Anti-Plunder Law kag Republic Act No. 3019 ukon Anti-Graft and Corrupt Practices Act, ang isa ka opisyal sang gobyerno nga nagaatubang sang kaso sang plunder ukon graft kinahanglan suspindihon samtang nagapadayon ang proseso sang kaso.
Sa pahayag ni Estrada nga bukas siya sa paggamit sang tanan nga legal nga remedyo nga ginatugot sang kasuguan, ginatudlo niya ang iya boluntaryo nga pagsungka sa otoridad kag ang iya direktiba sa Senate Secretary nga suspindihon ang iya sweldo bilang pagpamatuod sang iya kooperasyon sa proseso.
Suno sa Office of the Ombudsman, ginapatihan nga nakabaton si Estrada sang tubtob P573 milyon nga kickback gikan sa ginamanipular nga alokasyon sang Department of Public Works and Highways (DPWH) para sa mga flood control projects sang 2025.
Nahibaluan sang Mayo 29, nagpaguwa sang warrant of arrest ang Second Division sang Sandiganbayan batok kay Estrada kag kay anay DPWH Secretary Manuel Bonoan para sa una nga kaso sang graft. Nakaguwa sila sa kustodiya sa amo man nga adlaw matapos makapiyansa sang tig-P90,000.
Samtang sang Hunyo 1, nagpaguwa naman sang ikaduha nga warrant of arrest ang Fifth Division sang Sandiganbayan batok kay Estrada, Bonoan kag tatlo pa ka opisyal sang DPWH para sa kaso nga plunder nga wala sang piyansa.
Sa karon, ginaditinar si Estrada kag tatlo niya ka kaupod nga akusado sa New Quezon City Jail sa Payatas, samtang si Bonoan yara sa hospital arrest bangud sang iya ginabatyag sa lawas.
Dugang pa, sang Hunyo 3, isa naman ka warrant of arrest para sa ikaduha nga kaso sang graft ang ginserbe batok kay Estrada kag sa iya kaupod samtang yara sila sa prisohan.
