Nagpagwa sang precautionary hold departure order (PHDO) ang Sandiganbayan batok kay Senador Rodante Marcoleta, Former Rep. Mike Defensor, kag duha pa ka mga opisyal may kaangtanan sa kaso nga plunder kag indirect bribery base sa findings sang Office of the Ombudsman.
Gin-issue sang 7th Division sang anti-graft court ang precautionary hold departure order, sa diin ginalakipan man sanday Joseph Varias Espiritu kag Aristotle Baluyut Viray.
Suno sa imbestigasyon, may kaangtanan ang kaso sa ginaalegar campaign donation nga nagalab-ot sa P75 million nga nabaton ni Marcoleta halin sa kaupod nga akusado.
Base sa report, nag-file sang request ang Office of the Ombudsman para sa precautionary hold departure ordersang Mayo 25, isa ka adlaw antes ini gin-issue sang korte.
Temporaryo nga ginadumilian sang precautionary hold departure order ang isa ka indibidwal nga magguwa sa pungsod samtang gina-review ang kaso, bisan pa nga wala pa sang pormal nga panumbungon nga ginpasaka sa korte.
Ginrekomendar sang Ombudsman field investigators ang pagpasaka sang plunder case sa idalom sang Republic Act 7080 kag paglapas sa Presidential Decree No. 46, nga nagadumili sa pagbaton sang regalo sang mga opisyal sang gobyerno.
Ginrekomendar man ang kaso nga indirect bribery batok kay Marcoleta.
Naguwa sa imbestigasyon sang Commission on Elections nga ginaalegar napaslawan si Marcoleta sa pagdeklarar sang nasambit nga mga donasyon sa kampanya sa iya Statement of Contributions and Expenditures.
Nahibaluan nga ang P75 million ang gin-alegar ginpadala sa sulod sang apat ka adlaw sang Enero 2025 gikan kanday Defensor, Espiritu, kag Viray.
