ROXAS CITY – Ginpanindugan sang pila ka mga Sangguniang Bayan Member nga ginabug-usan sang Team BOCOG nga nagsandig lamang sila sa Internal Rules of Procedures ukon IRP sa ila pagpatigayon sang session sadtong Setyembre 28 kag Oktubre 5, 2020.
Sa interview sang Bombo Radyo kay SB Member Ferdinand Baguio isa sa mga miyembro sang Team BOCOG nga ginalakipan nanday SB Members Baguio, Orelio, Cordero, Obordo kag Gallardo nga wala sang kinamatarong nga ideklarar nga null and void ang amo nga sessions bangud mahimo lamang nga mag resolbar sini amo ang Department of Interior and Local Government ukon DILG ukon ang mga nagakaigo nga ahensya sang gobyerno.
Suno kay Baguio nga nagpadala sila sang sulat sa provincial office sang DILG sa pagpamuno ni Provincial Director John Ace Azarcon sadtong Oktubre 14.
Nahibaluan nga nabaton man nila gilayon ang sulat nagikan kay Azarcon kun sa diin naghalin sa Regional Director sang DILG-6 sadtong Oktubre 21 nga ginapahayag ang korte suprema lamang mahimo nga makadesisyon kun valid ukon null and void ang amo nga session.
Magluwas diri, wala man sang jurisdiction ang Sangguniang Bayan nga magdeklarar sang null and void ang pagpatigayon sang session sang Team Bocog apisar nga pila sa mga SB Member ang wala nagtambong.
Mahibaluan nga nagtuga ini sang pila ka mga argumento sa tunga sang pila ka mga SB Members kag presiding officer Vice Mayor Ralph Ordunia kasunod sang ila pagpatigayon sang session.
