ROXAS CITY-Ginatinguhaan sang Sangguniang Panlalawigan nga makakita sang dugang nga pondo para sa pagbakal sang dugang nga mga Personal Protective Equpments ukon PPEs para sa mga Health Workers sa mga ospital sa probinsya sang Capiz.
Ini ang ginpabutyag ni Vice Governor Jaime Mitang Magbanua sang mainterview sang Bombo Radyo.
Suno kay Magbanua nga nagsugod na ang ila pagpanghatag sang 350 ka mga PPEs sa mga health workers nga naga serbe nga frontliners sa Roxas Memorial Provincial Hospital, Rural Health Units kag iban nga mga ospital sa probinsya.
Apang aminado si Magbanua nga indi ini bastante bangud 30 ka mga PPEs ang gina usar sang mga health workers kada adlaw.
Samtang ginkumpirmar ni Magbanua nga may yara na sang dugang nga ginapatahi nga PPEs nga aprubado sang mga doktor nga sarang gamiton sang mga health workers.
Matandaan nga isa sa mga problema sang mga health workers amo ang kakulangan sang mga Personal Protective Equipments ukon PPEs nga ginagamit sa mga ospital sa pagpakigbato sa Covid-19 Disease
