ROXAS CITY – Ginapangayuan sang Sangguniang Panlalawigan ang Roxas Memorial Provincial Hospital sang mga nagakaigo nga dokumento sa mga job hire, contract of service kag mga listahan sang bulong nga ginpamakal humalin sadtong Hulyo 2019 tubtob subong.
Ini ang ginpahayag ni Board member Jonathan Sonny Besa sang ma-interview sang Bombo Radyo.
Suno kay Besa, nga wala man sila sang gintalana nga petsa nga ginhatag sa RMPH, apang nagpanugyan ang sangguniang panlalawigan sa nasambit nga ospital nga gilayon magsumiter sang mga listahan nga ginapangayo sa ila.
Dugang pa ni Besa, kun matandaan may yara pa sang mga isyu nga nakapending sa RMPH ilabi na sa mga pasweldo para sa bulan sang Nobyember kag Disyember sang nagligad nga tuig gani kinahanglan nila nga ma-determinar antes sila maghimo sang ila nga rekomendasyon.
Nagpanugyan man ini sa pamunuan sang RMPH nga mag-kooperar agud ang tanan nga problema nga nagakahinabo sa sulod sang ospital ang gilayon nga maaksyunan kag makahatag sang insakto nga pagserbisyo sa mga pumuluyo.
Ginklaro ni Besa, ang indi pagpasweldo sa mga medical front liners ang indi kahimuan sang Sangguniang Panlalawigan kundi kahimuan sang tagdumalahan sang ospital.
Bangud suno diri, una, nag-renew sang kontrata ang pamunuan sang RMPH para sa mga job hire kag contract of service nga wala nagpahibalo sa SP.
Ikaduwa, gin-certify ni Dra. Edmarie Magallanes-Tormon sa kontrata nga may yara pa sang funds nga available apang sa matuod wala gali sang pondo nga pagakuhaan kun sa diin nagasalig ang pamunuan nga paga-aprubahan gilayon sang SP ang ila gina-request nga supplemental budget.
Ikatatlo, nagpataas sang sweldo ang RMPH sa mga empleyado nga wala nagpangayo sang pahanugot gikan sa SP.
Ginpahayag sang nasambit nga board member nga madamo sang gin-bayolar ang RMPH, bangud indi awtorisado si Dra. Tormon nga mag-certify nga may pondo nga available kag klaro ini sa local government code nga ang awtorisado lamang nga maka-certify amu ang treasurer.
Sa karun, indi pa maathag ni Besa kun masabat ang nasambit nga problema bangud kinahanglan pa nila nga makit-an ang mga listahan nga igasumiter sang nasambit nga ospital.
