ROXAS CITY – Ginkadismaya sang mga miyembro sang Sangguniang Panlalawigan ang wala naman pagtambong sang ila ginpang-imbitar nga resource speakers sa ila nga sesyon.
Ini ang magasentro kuntani sa pagtalakay sang pondo ukon budget-deliberation sang gobyerno-probinsiyal partikular na ang pagpain sang pondo para sa mga ospital sa probinsiya.
Mahibaluan nga kalakip sa gin-imbitar sang SP amo ang Provincial Adminstrator, Provincial Engineer, Provincial Budget Officer, Provincial Health Officer, Chiefs of Hospitals kag pila ka katapo sang RMPH apang lunsay ‘no show’ ang mga ini.
Nagpadala lamang sang sulat si Provincial Administrator Edwin Monares kun sa diin ginsaad sini ang pila ka mga rason nga indi sila makatambong sa amo nga sesyon.
Kasunod sang ila pagbasa sang sulat, ginpahayag ni Board Member Ricky Martin, kasubong nga nagapakita si Monares sang iya batasan nga pagka-‘palaban’.
Suno diri nga wala nila mauyunan ang pila ka mga rason nga ginsaad ni Monares sa sulat nga nagapakita nga kasubong maisog pa ini.
Wala man mauyunan ni Board Member Matt Hachuela ang pagpadala sang sulat ni Monares sa SP.
Suno diri nga kasubong nagatugda si Monares bangud ang gobernador ang nagakadapat nga magsabat sang wala pagtambong sang ila ginpang-imbitar nga resource speakers.
Bangud diri, desidido sila sa SP nga pasakaan sang Grave Misconduct si Monares.
Bangud diri, luyag naman ni Board Member Jonathan Sonny Besa nga magpasaka sang nagakaigo nga kaso batuk sa mga department heads nga wala nagtambong.
Luyag man sini nga mapasakaan ang mga ini sang reklamo sa Office of the Ombudsman bangud sa wala gihapon pagre-convene sang Provincial Development Council (PDC) agud amyendahan ang 2020 Annual Investment Plan (AIP).
Matandaan nga ginrekomendar sang SP ang pag-ammend sa AIP matapos nga nakitaan nila sang duplikasyon sang pondo ang pila ka mga proyekto.
Ginapahayag pa nga kun sumahon lamang kag ensaktuhon ang pagpain sang pondo sa mga proyekto, sobra ang AIP sang kapin sa 100 milyones pesos rason nga luyag ini nga ma-ammend sang SP.
