ROXAS CITY – Kumbinsido ang chairman sang Committee on Agriculture sang Sangguniang Panlalawigan nga antes sila magpapasar sang resolution nga ipalab-ot kay President Rodrigo Duterte, maga-request sila sa Criminal Investigation and Detection Group (CIDG) sang incident report angut sa ginaalegar pagkidnap kay Patroceño Don Chiyuto, CEO sang Double your Money Investment Scheme.
Ginpahayag ni Board Member Ricky Martin nga mangin balasehan sang ila pagahimoon nga tikang ang incident report sang CIDG agud makadihon sila sang resolusyon nga ipalab-ot kay President Rodrigo Duterte.
Importante man nga mahibaluan sang Sangguniang Panlalawigan kun diin na kutob ang imbestigasyon sang mga otoridad bangud tobtob sa karon nagapabilin nga haka haka lamang ang tanan sa ginaalegar pagkidnap kay Chiyuto kag ang paghilway sa mga suspek.
Gindugang pa sang opisyal nga indi man sarang nga mabasol ang mga pumuluyo labi na ang mga investors nga magpanumdum kun legit ukon drama lamang ang ginaalegar pagkidnap kay Chiyuto.
Suno kay Martin may posibilidad nga mahilway ang ginasiling mga suspek nga gin-aresto sang kapulisan bangud sang report nga wala sang kaso nga ginpasaka sa ila.
Samtang ginakumbinse ni Martin ang mga investors nga subong pa lamang magpasaka na sila sang complaint batuk kay Chiyuto kag ilakip diri ang mga uplines.
Nagpanawagan man ang opisyal sa mga uplines kag downlines nga mag-unite ukon maghugpong sa pagpasaka sang complaint kay Chiyuto.
