ROXAS CITY – Magapasaka sang panumbungon ang Sangguniang Panlalawigan kun dayunon ni Capiz Governor Esteban Evan “Nonoy” Contreras ang pagbakal sang 30 ka mga units sang rescue vehicle.
Ini ang ginpahayag ni Board Member Jonathan Sonny Besa sang mainterview sang Bombo Radyo Roxas.
Suno kay Besa nga posible wala ginbasa sang gobernador ang ginpapasar nga resolusyon sang Sangguniang Panlalawigan kun sa diin nakasaad diri nga gin-identify ang mga proyekto para sa probinsya.
Ginpahayag ni Besa nga sang nagpatigayon sang session ang provincial board, ginkwestyon pa sini kun ano nga rescue vehicle ang plano nga baklon sa kantidad nga P24 milyones.
Apang, indi pa makadesisyon si Capiz Governor Esteban Evan “Nonoy” Contreras natuhoy diri.
Ginpangabay naman sini nga kuntani magpangayo anay sang pag-aprubar gikan sa Sangguniang Panlalawigan antes magpatigayon sang bidding kag mapresentar ini.
Nahibaluan nga nakasaad ini sa resolusyon nga nagakadapat nga ipaiway anay ang pagbakal sang mga rescue vehicles kag igaprayoridad ang pag-reserve sang budget para sa bakuna kontra COVID-19.
Dugang pa sini nga kun mangin available na sa merkado ang bakuna, mahimo nga mapahapos na lamang ang pagbakal bangud may yara na sang pagakuhaan nga pondo.
Samtang, ginapangabay lamang sini nga kuntani indi na mag-abot pa sa punto nga magdepende na lamang gin-alokar sang national government ang COVID-19 vaccine kun mahimo man lang nga mapondohan sang lokal nga gobyerno.
