ROXAS CITY – Natalana nga magpatawag sang isa ka committee hearing ang Sangguniang Panlalawigan agud talakayon ang ginpapasar nga ordinansa sang Sangguniang Panlungsod may kahilabtanan sa plano nga pag-broadcast sa publiko sang ‘E-bulang’ ukon online-bulang.
Ini ang ginpahayag ni Board Member Jonathan Sonny Besa kasunod sang pag-kwestiyon sang pila ka miyembro sang provincial council sa amo nga ordinansa.
Ang nasambit nga ordinansa amo ang City Ordinance No. 009-2020 ukon ‘ Ordinance Granting Franchise to United Association of Cockpit Owners and Operators of the Philippines, Incorporated to Broadcast and Data Streamed Cockfighting Activities and Derbies at Commercial Establishments and to Establish, Operate, and Maintain Off-site Cockpit Betting Station within the City of Roxas’.
Suno kay Besa nga sa ila sesyon, natalakay nga sa nasambit nga online-bulang, mahimo makompromiso ang moral sang mga kabataan.
Ini bangud indi nila ma-regulate ang mga nagataya sa nasambit nga online-bulang kag dako ang tsansa nga pati ang mga pamatan-an ang maganyat man nga magtaya diri.
Nagakadapat suno diri nga ila anay diskusyunan ang kaundan sang ordinansa.
Bangud diri, ipatawag sang provincial council ang city council agud matalakay sa ila ang kaundan kag mga probisyon sang amo nga ordinansa.
