ROXAS CITY – Nakasandig sa Sangguniang Panlalawigan ukon provincial board ang pagpadayon sa kontrobersiyal nga scholarship program.
Suno kay Governor Esteban Evan Nonoy Contreras kun mapangitaan lamang sang medyos ang pondo para sa nasambit nga program, wala ini sang mangin problema sa iya.
Apang kinahanglan lamang nga masustenir ini kag magataas tagsa ka tuig ang pondo bangud madamo man ini sang commitment sa mga nagbulig sa iya sang nagligad nga eleksyon.
Aminado ang gobernador nga ang kagustuhan nga magbulig, yara apang ang palamangkutanon kun diiin makuha sang pondo sa tuman kadamu nga numero sang mga scholars nga ginpromesahan sang nagligad nga administrasyon.
Suno sa opisyal nga indi man mahimo nga ihatag na lamang ang tanan nga pondo sang iban nga programa kasubong sang para sa mga mangunguma, ikaayong lawas, tourism, infrastraktura, karsada, sports kag iban pa sa scholarship program.
Apisar nga aminado man ini nga kalakip man sa iya prayoridad ang programa sa kabataan ukon edukasyon, apang nagapati ini nga kinahanglan niya nga balansehon ang tanan para sa kaayuhan kag ikalipay sang tanan.
Aminado man ini nga indi niya ma-please ang tanan nga tawo apang ang iya lamang panindugan nga ensaktuhon kag kaayuhon ang ginapatuman nga programa.
