ROXAS CITY – Nagaapelar sa karon ang Sangguniang Panlalawigan sa executive department kag sa gobernador sang probinsiya nga magre-convene na ang Provincial Development Council (PDC) agud maamyendahan na ang Annual Investment Program (AIP) para sa tuig 2020.
Ini ang pinaagi sa mosyon nga ginduso ni Board Member Jonathan Sonny Besa sa ginpatigayon nga sesyon sang SP.
Matandaan nga wala maaprubahan sang SP ang AIP matapos nga nakitaan sang duplikasyon sang pondo ang pila ka mga proyekto sa 20% development fund.
Kinahanglan suno kay Besa nga matalakay na ini sang PDC kag maamyendahan.
Suno kay Besa nga nakapapasar sila sang resolusyon nga naga-refer pabalik sa executive department sang AIP agud mahitsu ang nakita nga mga duplikasyon sang SP.
Nagapati si Besa nga ang solusyon agud dalayon na nga mapapasar ang AIP 2020 amo ang pag-reconvene sang PDC agud matalakay ang pila ka nakita nga discrepancy sa mga proyekto nga ginapatuman sa kabanwahanan.
Ginpahayag pa ni Besa nga indi magnubo sa 30 ka mga kabanwahanan ang nakitaan sang duplikasyon sang pondo sang proyekto gani kun matalakay ini liwat, posible pa suno sa iya nga mapanubuan sang kapin 100 milyones pesos ang AIP.
