ROXAS CITY – Maid-id nga pagatun-an sang Sangguniang Panlalawigan ang gina-request nga kapin P100 milyones nga supplemental budget ni Capiz Governor Esteban Evan Nonoy Contreras.
Ini ang ginpahayag ni Board Member Jonathan Sonny Besa, Chairman sang Committee on Appropriation sang mainterview sang Bombo Radyo.
Ginpahayag ni Besa nga duha ka mga supplemental budget ang ginahinyo ni Contreras nga ginakalakipan sang kapin sa P21 milyones nga pundo nga gikan sa Provincial Health Office.
Suno kay Besa nga pagagamiton ang nasambit nga pondo para sa suweldo sang mga empleyado sang RMPH.
Apang paga-usisaon pa sang nasambit nga opisyal kun ngaa naka-address ini sa talatapan sang gobernador kag indi sa Roxas Memorial Provincial Hospital.
Samtang, kalakip man sa ginahinyo sang gobernador sa Sangguniang Panlalawigan amo ang kapin P81 milyones nga supplemental budget.
Ginpahayag ni Besa nga pagagamiton ang amo nga pondo para sa pagpatindog sang P10 milyones nga Radio Station, P20 milyones nga titling kag iban pa nga kinahanglanon sang Capitol Hills, P12 milyones nga pagpabakal sang backhoe kag pagbakal sang mga kinahanglanon subong nga COVID-19 Pandemic.
Suno kay Besa nga iban diri ang mahimo nga maaprubahan ilabi na ang mga kinahanglanon batuk sa COVID-19 magluwas sa pagpatindog sang Radio Station, Titling sang Capitol Hills, kag iban pa.//
Ginpahayag ni Besa nga kinahanglan pa nga tun-an sang maid-id kun tuman gid ka-importante nga pundohan ang pila ka mga ginahinyo ni Contreras.// Gindugang pa sini nga nagakadapat nga panumduman sang probinsiya ang mga dapat gastoson ilabi na sa tion sang pandemiya.
