SIGMA, CAPIZ- Ginbasura sang Sangguniang Panlalawigan sang Capiz ang reklamo nga ginpasaka sa konseho sang pila ka mga indibidwal parte sa pagka-balido sang ginapatuman nga Ordinance No. 05, series of 2024, ukon ang “Ordinance Setting the Speed Limit for all Kinds of Vehicles within the Territorial Jurisdiction of the Municipality of Sigma, Capiz and Providing Penalties for the Violations Thereof”, kag man ang otoridad sang Public Order and Safety Unit (POSU) sa pagpangdakop sang mga violators.
Sa sesyon sang Sangguniang Panlalawigan, ginpresentar ang joint committee report sang Committee on Transportation, Communication, and Public Utilities kag Committee on Local Government nga may kaangtanan sa isyu nga ini.
Sa interview sang Bombo Radyo kay 2nd District Board Member Aldwin Cruz-Am, iya ginpahayag nga ang gahum sang Sangguniang Panlalawigan bilang lehislatibo limitado lamang sa pag-review sang “validity” ukon “legality” sang ordinansa nga ginapasar, kun ini nagasanto sa konstitusyon, mga nasyonal nga layi, ukon iban pa nga mga polisiya nga naga-eksister.
Ginpakigbahin pa sini nga kun aprubado na ang lokal nga ordinansa, may yara ina sang “presumption of validity”, rason nga ang kun ano man nga reklamo parte sa implementasyon ukon “misapplication” sini indi sakop sang function sang Sanggunian.
Bangud sini, ginrekomendar sang mga komitiba nga i-terminate ukon ibasura ang reklamo bangud sa “lack of jurisdiction.”
Gilayon ini nga gin-adoptar kag ginpanugyanan ni Cruz-Am nga aprubahan ang resolusyon natuhoy sini. Ginsuportahan ini sang iya mga kaupdanan sa Sanggunian kag naaprubahan pinaagi sa “unanimous vote.”
Matandaan nga suno sa mga reklamo nga ginpasaka sa Sanggunian, luyag sang mga nasambit nga indibidwal nga tun-an sang konseho ang pagka-balido sang ordinansa nga ini, nga sa ila panglantaw, sala.
Samtang, sa ginpatigayon nga press conference sang nagligad nga adlaw, ginpahayag ni Sigma Mayor Dante Rizal Eslabon nga balido ang nasambit nga ordinansa kag may gahom ang Public Order and Safety Unit (POSU) sa pag-implementar sini apisar wala pa sila sang “deputation order” nagikan sa Land Transportation Office (LTO).
With a report from Bombo Sunnie Mae Batencila
