ROXAS CITY – Ginkompirmar ni City Councilor Albert Gregore Potato nga nakabaton sang reklamo ang Sagguniang Panlungod batuk sa duha ka mga punong barangay sa siyudad sang Roxas.
Sa interview sang Bombo Radyo kay Potato ginpahayag sini nga nakabaton sila sang duha ka seperado nga complaint batuk kanday Punong Barangay Einstein Okpora sang Barangay Inzo Arnaldo Village kag Punong Barangay Mario Artillero sang Barangay Dumulog sining siyudad.
Ang reklamo kay Okpora may kaangtanan sa pagpull-out sini sa isa ka LSI sa quarantine facility nga wala sang permiso gikan sa mga otoridad samtang kay Artillero naman amo ang anomaliya sa pagpanagtag sang Social Amelioration Program (SAP).
Suno kay Potato nga kalakip ini sa ila gintalakay sa ila nakaligad nga mga sessions.
Mahibaluan nga grave misconduct kag serious dishonesty ang ginreklamo kay Artillero kun sa diin ang committee on good governance ang magapatigayon sang imbestigasyon sa pagpanguna ni City Councilor kag Atty. Paul Ivan Baticados.
Ginpahayag ni Potato nga nag manifest ini nga mag inhibit sa reklamo batuk kay Artillero bangud sang damlag lang nangin kliyente niya ini kag para malikawan ang conflict of interest bilang kabahin sang Judicial System.
Samtang grave misconduct kag serious dishonesty naman ang ginreklamo batuk kay Okpora kun sa diin nagaserbi nga chairman sang Committee on Good Governance si Potato.
Ginpahayag ni Potato nga nag-isyu na sila sang order batuk kay Okpora kag ginahulat na lamang nila ang sabat sini.
Mahibaluan nga sarang makapanaog sang 6 months suspension ang konseho sa oras nga mapamatud-an nga may yara sang kasaypanan ang duha ka mga nasambit nga opisyal.
